巴基斯坦 - 結婚前就做爸爸的公主結婚後就做家中的皇后
曾經有人同我講過，如果你留喺巴基斯坦我永遠都唔會要你辛苦工作只做我嘅公主😝😝😝當時我心諗呢個人講嘢咁浮誇嘅！加上巴基斯坦男人個個都有一對梁朝偉咁嘅電眼，如果我係D入世未深嘅細路女容咩易比佢呃左去巴基斯坦！
後來我到巴基斯坦嘅次數越多同佢哋相處越多，而且經我嘅觀察原來呢度嘅所有女人真係好似公主咁唔駛做咖，舉幾個例子比大家瞭解下先。
1. 就以新娘同佢D妺妹表姐妹為例，番學（中/大學）一定有司機接送從來唔駛去迫車，閒時就係去shopping /high tea/影吓自拍相放上網，巴基斯坦女生極喜愛化妝，佢哋上高中之後日日都化妝扮靚。大學畢業就嫁人，然後基本上從來無打過工無試過受老闆氣，佢哋嘅角色由做家中小公主之後變學生然之後人妻之後做媽媽過多二十幾年之後又做嫲嫲/婆婆，正如男主人講婚前爸爸養婚後老公養之後自己個仔長大出來工作做埋太后，老公同個仔份糧都交比佢管理，簡直係屋企嘅皇太后咁掌握家中經濟大權，在巴基斯坦女性地位竟然咁高。據女主人講佢係家中獨女有一個哥哥一個弟弟，佢媽媽以前連家務都捨得唔比佢做，佢爸爸錫佢鍚到不得了，每日放工返屋企都送佢一份小禮物，直到現在雖然佢已經嫁左人，但佢每次去探佢爸爸都送禮物比佢，又堅持送佢落樓上車，仲有每日都打電話傾計，我親眼見到呢啲情況，佢真係好錫個女。
2. 平常我哋去買衫買化妝品多數都係自己或約埋朋友去行街，但巴基斯坦十分流行全家人去購物。例如女主人想去買衫，全家總動員一齊去買，對我嚟講三個仔高中大學呢個年紀肯陪阿媽一齊去揀衫非常難得，我相信香港嘅男仔到左中學之後肯同阿媽去買衫無幾多個，仲要去睇女裝，買完又幫手拎嘢。不過經我觀察，除咗佢哋三兄弟咁乖仔之外，好多家庭都係咁，香港反而好少。
3. 到左巴基斯坦三個星期，我都不經意做埋公主三個星期，好驚之後番唔到轉頭😝。我每次想出外買嘢佢哋都一定唔比我自己出去！一定係叫三個仔或一家人陪我！就算有司機都唔會單獨比我同司機去 ！ 去ATM又叫個仔陪我，去買女裝衫又陪我行足幾個鐘，之後又好乖幫我攞曬全部嘢，總之我想出去必定有人陪我，就好似多左三個保鏢咁開頭好唔慣又唔好意思，平時我慣咗一個人周圍去，突然要幾個大學生陪我去購物我真係好唔慣。但當我開始好享受時就要離開呢度了🤣
4. 對於我來講最離奇嘅事就係呢度嘅女性好似連行多兩步都懶到咩咁！話説我嚟到成日去佢哋屋企街口間裁縫店造衫，行路去其實只係兩分鐘。有一次我買曬布料準備行去造裙，女主人叫我上車司機車我哋去，我心諗唔係行去隔離咩？於是乎我跟住上車，車真係停左在縫裁店門外，然後開車窗同裁縫講要點整，之後揸車番屋企，雙腳完全無落過地，成件事都好神奇，我諗起我喺香港成日自己一個人攞住幾十袋順豐郵件去寄，仲要行幾條街滴曬汗咁😭但佢哋攞住一塊布去兩分鐘路程嘅地方都要坐車，而家我深深明白點解巴基斯坦咁多女性著公主䄂，喇叭褲同高踭鞋因為佢哋連行路都唔駛咖😭港女同巴基斯坦嘅命運相差太遠了😭
5. 女性通常不會同外界有太多接觸，例如有日有人㩒門鐘，工人去開門，之後同女主人講左一大堆嘢，之後女主人叫工人叫醒瞓緊覺個仔出去，我開頭以為有朋友 去佢屋企搵佢個仔，原來係一個負責整理天台植物嘅花王嚟整理吓植物，工人想叫花王要特別注意某啲植物，但咁簡單都唔可以直接同個花王講，要叫醒個仔去同個花王講，女主人話不方便同其他男人講咁多。仲有去銀行又要兩個一齊去，買支洗甲水都要一齊去！我哋喺香港唔通真係太獨立？ 成日都係自己處理所有嘢，就連啲咩電訊公司寬頻有問題都係自己去投訴啦，邊可以成日等屋企有男人得閒去處理！
總括來講，其實之所以有呢啲公主文化嘅形成係因為巴基斯坦有強列嘅保護女性文化，佢哋認為女性比較弱質纖纖，所以作為爸爸或丈夫必定要盡全力去保護佢哋免受傷害，而且要比最好嘅一切令到所有公主都開心。小男孩都會從少就訓練要照顧家中的所有女性，所以呢個係一個好好嘅傳統。睇左咁耐所有港女係咪睇到好羡慕呢？係咪有一個衝動嫁去巴基斯坦做一世公主呢？ 不過比公主你做就當然有條件啦，世界上又邊有咁大隻蛤乸隨街跳😝
首先巴基斯坦女性係不可以一個人周圍去，就算買少少嘢都要有老公/爸爸/你個仔陪，去旅行更加只可以同你嘅家人一齊，唔駛旨意同朋友或自己一個去旅行，對於我來講好無自由啊，我最鍾意周圍去，如果唔可以一個人落街或去旅行我真係想死。既然男人比曬D錢你，當然要負責一家人起居飲食，煮更多你老公喜歡嘅食物，男士們放工回到家想要茶就沖茶想要飲咩食咩都要即刻去整，鬼叫你係全屋企最得閒又唔駛番工果個。而且佢哋通常同奶奶老爺老公嘅兄弟姊妹同住，所以所有嘅屋企人你都要照顧埋。仲有我觀察大部份女士們都係好小鳥依人，老公講咩都點頭答知道，好似我呢啲咁鍾意駁嘴既人真係遲早離婚都似。
咁公主文化係咪只有經濟好嘅人至有呢 ？原來就算比較窮嘅家庭都一樣會保護女性，當然經濟唔好女性都要去打工幫補屋企，但男士們都一樣會盡力，例如在女主人屋企打工嘅兩母女，佢個細仔每日放學之後都嚟接佢媽咪家姐番屋企，又例如喺公共交通工具有規定男士係一定要讓座比所有女性。
睇左咁耐你決定到做巴基斯坦公主定係港女未？ 我就覺得都係做一個咩都係自己話事靠自己嘅港女比較好，起碼更加自由唔駛靠人。公主就一年回巴基斯坦一兩次先做啦😝😝😝至於十分尊重女性的巴基斯坦男人似乎都嫁得過🤣
《待續》
別忘了把Facebook專頁為"搶先看"（See first）以及"開啟通知"（Notification On）
較詳盡的更新在Facebook: indiapinkpink
濕濕碎碎的更新在Instagram：indiapink
Search